4 недели назад 115
Боронукка күрэхтэһиилэр
Ыраах Дьааҥы улууһун Боронук бөһүөлэгэ олус сэргэхтик олорорун “Сиккиэр” медиа-киин оҕолоро (сал. А.Т. Стручкова) өрөспүүбүлүкэҕэ өрүү сырдаталлар.
Тырыыҥка-2025
Ийэ тыл, сурук-бичик күнүгэр Дьааҥы куоратын 1-кы, 2-с нүөмэрдээх уонна Боронук иитиллээччилэрин икки ардыгар “ТЫРЫЫҤКА-2025” күрэх үрдүк таһымнаахтык буолан ааста.
Тэрээһин бастакы чааһыгар сахалыы таҥастаах оҕолор, хомус тыаһынан доҕуһуоллатан, саалаҕа киирэн, сыана иннигэр туран, “Сарсыарда” диэн ырыанан арыйдылар. “Сахалыы санаалаах буоламмыт, сахалыы хоһоону этиэхпит” диэн аахтылар Сева, Айгылаан, Алеша. Саамай кырачааннарбыт – “Уу-чукучук” бөлөх оҕолоро – убайдарыттан хаалсыбатылар. Ыалдьыттарбыт Дьааҥы куоратын 1-кы нүөмэрдээх уһуйаанын иитиллээччилэрэ эмиэ хоһоон кэһиилээх кэлбиттэр.
Тэрээһиммит бастакы чааһын оһуохайынан түмүктээтибит. Ол кэнниттэн “Кустук” улахан уонна бэлэмнэнии бөлөх оҕолоро өс хоһоонунан суруллубут “Эриэппэ” остуоруйа инсценировкатын оонньоон көрдөрдүлэр.
Төрөөбүт тылга анаммыт күн иккис аҥаарыгар Боронук, Дьааҥы куоратын 1-кы, 2-с уһуйааннарын икки ардыларыгар тырыыҥкаҕа куоталаһыы буолла.
Күрэх буолуон иннинэ Дьааҥы куоратын 1-кы нүөмэрдээх уһуйаанын оҕолоро “Тырыыҥка” диэн ырыаны ыллаатылар.
Тырыыҥкаҕа Дьааҥы куоратын 1-кы нүөмэрдээх уһуйааныттан 5 оҕо, 3 салайааччы кэлбит: Рожина Ангелина, Попов Денис, Горохова Аделина, Чиркова Тея, Васильева Мичийэ уонна Аммосова Саргылана Иннокентьевна, Слепцова Мария Гаврильевна, Федорова Валентина Константиновна.
Верхонянскай 2-с нүөмэрдээх оҕо саадыттан 3 оҕо, 2 салайааччы: Потапов Максим, Попова Дуня, Васильева Лея уонна Васильева Анна Трофимовна, Максимова Саргылана Прокопьевна.
Боронук биэбэйигиттэн 5 оҕо, 3 салайааччы: Попов Всеволод, Попова Айлина, Рожин Айгылаан, Неустроева Майя, Оппоев Алеша уонна Горохова Христина Христофоровна, Мордовская Василина Васильевна, Горохова Анна Игнатьевна.
Онон барыта 14 оҕо кытынна. Бу оонньуу оҕо толкуйдуур дьоҕурун, сатабылын, тобуллаҕас өйүн сайыннарар, тулуурдаах, болҕомтолоох буоларга иитэр. Кыттааччыларбыт да бары даҕаны бу оонньууга тырыыҥканы остуолга сэрэнэн ыһан, ыксаабакка арааран, хамсаппакка ылан, сымсатык хамсанан, элбэҕи хомуйа, ситиһэ сатаатыллар.
“Тырыыҥка-2025” күрэх кыайыылаахтарынан буоллулар:
I үрдэлгэ – Попова Айлина, Боронук уһуйаанын иитиллээччитэ.
II үрдэлгэ – Рожин Айгылаан, Боронук уһуйаанын иитиллээччитэ.
III үрдэлгэ – Горохова Аделина, Дьааҥы куоратын 1-кы нүөмэрдээх иитиллээччитэ.
Кинилэр Добун суругунан, мэтээлинэн, сакалаатынан наҕараадаланнылар. Кыттыбыттар бука бары туоһу сурук уонна сакалаат тутан үөрдүлэр-көттүлэр.
“Зарница” оонньоотубут
Арассыыйаҕа Аҕа дойдуну, Саха сиригэр Ийэ дойдуну көмүскээччи, оттон Дьааҥы оройуонугар Патриотизм уонна гражданскай эппиэтинэс сылларынан, итиэннэ Аҕа дойдуну көмүскээччи күнүн көрсө, улахан тэрээһин буолан ааста.
Тэрээһин өлбүт-сүппэт полкаттан саҕаланна. Артём Иванов чуор кэрэ куолаһынан сырдык тыыннарын толук биэрбит саллааттарга анаммыт ырыаны толордо. Буорах сыттаах хоһооннору оҕолор иэйиилээхтик ааҕан иһитиннэрдилэр. Кыайыы өрөгөйдөөх үҥкүүтүн үрдүкү кылаас оҕолоро үҥкүүлээтилэр.
Маннык тэрээһин бар дьону түмэр уонна биир санааҕа киллэрэр. Биһиги Кыайыыны уһансыбыт саллааттарбытын хаһан да умнуо суохтаахпыт, куруутун өйдүү-саныы сылдьыахпыт.
Дойдуга бэринииилээх буолууга ыҥырар сылбыт аһыллыытын кэнниттэн саллааттардыы хаамыы көрүүтэ буолла.
Арассыыйаҕа ыытылла турар “Зарница 2.0” быраабылатынан күрэхтэһии тэрилиннэ. Алын кылаас оҕолоро, 3 хамаандаҕа арахсан, күөн көрүстүлэр, үрдүкү кылаастар эмиэ 3 хамаанданан күрэхтэстилэр.
“Зарница 2.0” түөрт түһүмэхтээх. Бастакы түһүмэх билиини тургутар оонньуу этэ. Иккискэ биирдии хамаандаттан биир уол уонна биир кыыс буолан ОЗК (общевойсковой защитный комплект) таҥаһын ким түргэнник кэтэригэр куоталастылар. Үһүскэ аптамаат, рожок ыһыыта уонна хомуйуута. Төрдүскэ байыаннайдыы эстафета.
Иккис уонна 3-с хамаандалар тэҥ очукуолаах буолан, иккиэн кыайыылаах таҕыстылар. Үһүс миэстэни 1-кы хамаанда ылла.
“Сиккиэр” медиа-киин.
Боронук, Дьааҥы.
