1 месяц назад 927
Дурда-хахха буолар хоһуун дьоммут туһунан
Аҕа дойдуну, норуоту, иитиллибит Ийэ сири көмүскээччи туһунан саха литературатын үйэлээх айымньыларын кылгас ис хоһооннорун “Ааҕар Саха сирэ” түмсүү билиһиннэрэр:
Софрон Данилов “Киһи биирдэ олорор” (роман)
1922 сыл. Амма сис баайа Миитэрэй Аргыылап дьиэ кэргэнин олоҕо атыйахтаах уу курдук айманна. Уола Валерий үрүҥнэргэ кыттыста, кыыһа Кыыча хомсомуол буолуон баҕарар. Мүччүргэннээх сырыылар чекист уол Томмот Чыычаахап үрүҥнэрдии санаалаах Валерий Аргыылабы кытта илин эҥээргэ күрээһиннэриттэн саҕаланар. Хорсун уол Томмот тоҕо үрүҥнэргэ кыттыста? Кыыча уонна Томмот бииргэ буолуохтара дуо?
Саһыл Сыһыыга буолбут И.Строд уонна А.Пепеляев этэрээттэрин утарсыытын суруйааччы элбэх докумуону хасыһан, үөрэтэн сиһилээбит. Икки чаастаах бу роман, чахчы даҕаны, үгүс ааҕааччы сэҥээриитин ылыаҕын ылар.
Бастакы чааһын онлайн ааҕар сигэ: https://new.nlrs.ru/open/59964
Иккис чааһа: https://new.nlrs.ru/open/24191
Семен Яковлев-Эрилик Эристиин “Кэриэс туолуута” (сэһэн)
Саха талааннаах суруйааччыта, уустук дьылҕалаах Эрилик Эристиин бэйэтин олоҕор олоҕурбут айымньы. Сэһэн сүрүн геройа – Уулаах Уйбаан. Сир түҥэтигэ, саҥа олоҕу тэрийии түҥкэтэх сытар кытыы сир дьонугар туох уларыйыыны аҕалла?
Кыра Хабырыыс туох иһин суорума суолланна? Уулаах Уйбаан ким кэриэһин толордо? Өскөтүн эн дьиҥ-чахчы уран тылынан абылатыаххын, Эрилик Эристиин чаҕылхай олоҕун туһунан билиэххин баҕарар буоллаххына, бу айымньыны аах.
Аудио истэр сигэ: https://new.nlrs.ru/open/64346
Кинигэтин онлайн ааҕарга: https://new.nlrs.ru/open/95862
Тимофей Сметанин “Егор Чээрин” (новеллалар)
Талааннаах суруйааччы Тимофей Сметанин баара-суоҕа 28 сыл күн сиригэр олорбут. Кини үгүс кэрэхсэбиллээх айымньытыттан биир бастыҥнара – “Егор Чээрин”.
Саха саллаатын хорсун сырыыларыгар сэрии иэдээнэ, дьулаана көстүбэт, ол оннугар мүччүргэннээх түгэннэр, көрдөөх сюжеттар ааҕааччы кэрэхсиирин курдук ойууланаллар.
Саха киһитин холку майгытын, мындыр көрүүтүн, олоххо тапталын үйэтиппит үтүөкэннээх айымньы үгүс ааҕааччыны умсугутуон умсугутар.
Онлайн ааҕар сигэ: https://new.nlrs.ru/open/9412
В. И. Гоголев-Уйулҕан ырытан кэпсиир видеота: https://new.nlrs.ru/open/63726
Айымньы нууччалыы тылбаастаммыта: https://new.nlrs.ru/open/30795
Данил Макеев “Ат хараҕа” (кэпсээн)
Эйэлээх олоҕу, тапталлаах дойдуларын хаалларан барбыт икки сэрииһит – Баһылай уонна кини ата Улаанай – уоттаах сэриигэ кыайыыны уһансыыларын туһунан айымньы.
Баһылай тапталлаах атын кытта сэрии хонуутугар сүтэрсиилэрэ уонна булсуулара киһи эрэ уйадыйыах курдук суруллубут. Аҕа дойду Улуу сэриитигэр Саха сириттэн 45 тыһыынча ат хомуллубута диэн суруйаллар. Бу кэпсээн “Баатаралар Аҕа дойду сэриитигэр” диэн кинигэҕэ киирбит, В.Н. Шергин диэн саха киһитэ бэйэтэ айааһаабыт, мииммит атын сэрии хонуутугар көрсүүтүн туһунан долгутуулаах ахтыытыгар олоҕуран суруллубут.
Айымньыларга аннотациялары бэлэмнээбит “Ааҕар Саха сирэ” түмсүүгэ, итиэннэ буктрейлердары оҥорбут ыччат дьоммутугар “лайк” туруоруохха уонна маны дьоҥҥо тарҕатыахха.
