1 месяц назад 231
Өрүү баар буолуоҕа – Тыл уонна Таптал
Таатта улууһун Харбалаахтааҕы үөрэхтээһин холбоһугар Ийэ тыл уонна сурук-бичик күнэ бэрт сэргэхтик ааста. “Бастыҥнар хамсааһыннарын” актыбыыстара кылаас чааһын ыыттылар.
Уруоктар бүппүттэрин кэннэ Аал Луук маспыт тула оһуокайдаан ньиргиттибит. Оһуокайы ускуустуба оскуолатын фольклорга учуутала Айаал Багынанов, VII кылаас үөрэнээччитэ Женя Антоева таһаардылар.
Үөрүүлээх тэрээһини Яна Гузаирова, Миша Спиридонов салайан ыыттылар.
Учуутал Айаал Багынанов бу күн саха хомуһун киэҥ эйгэҕэ билиһиннэрбит, аар-саарга аатырдыбыт Лука Турнин төрөөбүт күнэ буоларын иһитиннэрэн туран, ырыа доҕуһуоллаах хомуска оонньоото.
Биһиги оскуолабыт норуодунай суруйааччы Н.Е.Мординов-Амма Аччыгыйа аатын сүгэр. Кини “Сааскы кэм” арамааныттан быһа тардан, инсценировкалары көрүү буолла.
“Алгыһынан саҕаламмыт төрөөбүт литэрэтиирэм 125 сыла” ТОК-оонньууну саха тылын учуутала Валентина Семеновна Кривошапкина тэрийэн ыытта.
Ахсыстан онуска диэри кылаастар үөрэнээччилэрэ, икки хамаандаҕа арахсан, боппуруостарга эппиэттээтибит.
Түмүккэ “Сааскы кэм ыччаттара” (түс киһибит Айсен Бястинов) бастаатыбыт,
“Амма Аччыгыйын сиэннэрэ” иккис буоллулар (түс киһилэрэ Миша Спиридонов).
Оҕолор наһаа астыннылар уонна сөбүлээтилэр. Бу оонньуу оҕо төрөөбүт литэрэтиирэтин төһө билэрин, өйдүүрүн көрдөрөр уонна оҕо билиитин хаҥатар, өйүн сайыннарар.
Сарсыардаттан, учууталбыт Варвара Павловна Трофимова тэрийиитинэн учууталларбыт киириигэ алгыстаах алаадьынан айах тутан көрсүөхтэриттэн ыла, Төрөөбүт тыл күнэ олус сэргэхтик ааста.
Ийэ тылбытын харыстыаҕыҥ, сахалыы уус-уран литэрэтиирэни ааҕан сайдыаҕыҥ!
Таисия Андреева, VIII кылааc.
Бэҕэһээ Тапталлаахтар күннэринэн Харбалаахтааҕы лиссиэй устудьуоннарыгар олус интэриэһинэй оонньуу буолла.
Оонньууну лиссиэй иитээччилэрэ М.В. Цой, В.В. Захарова тэрийэн ыыттылар. Устудьуоннар бары түһүмэхтэргэ көхтөөхтүк кыттан үөрдүлэр-көттүлэр.
Маннык тэрээһиннэр үүнэр ыччаты сомоҕолууллар, көхтөөх, бэйэ-бэйэҕэ болҕомтолоох буоларга үөрэтэллэр.
Иван Готовцев, Харбалаах.
