Таптал туһунан сахалыы айымньылар

Тапталлаахтар күннэринэн саха суруйааччылара тапталы үйэтиппит айымньыларын кылгас ис хоһооннорун билиһиннэрэбит.

Софрон Петрович Данилов “От үрэххэ” кэпсээнэ

От үрэххэ икки эр киһи балыктыы сылдьар. Кинилэр уу нуһараҥ сынньалаҥнарын кэрэ дьахтар Даайа Тулааһынаба уонна кини уола Ньургун кэлиитэ уйгуурдар. Миитэрэй Тытыгынаайап бу дьахтары эдэр эрдэҕиттэн таптыырын, ол эрээри Даайа кини доҕоро Ньукууһу ордорбутун туһунан долгутуулаах кэпсээнин саҕалыыр.

Миитэрэй сэрии уоттаах хонуутугар Ньукууһу көрсүһүүтүн, Ньукуус өлүүтүн туһунан туох кистэлэҥнээҕий? Ону тэҥэ Даайа, омос көрдөххө, судургу курдук эрээри, олус уустук көрдөһүүтүн Миитэрэй толоруо дуо? Айымньы дьоруойдарын дьылҕаларыгар ол хайдах сабыдыаллыан сөбүн туһунан ааҕааччы бу кэпсээни аахтаҕына билиэҕэ.

Онлайн ааҕар сигэ: https://new.nlrs.ru/open/2386

Платон Алексеевич Ойуунускай “Дойду оҕото Дорогуунап Ньукулай” сэһэнэ

Сэһэҥҥэ Тулагы-Киллэмтэн төрүттээх саха атыыһыта Дорогуунап Ньукулай мүччүргэннээх сырыылара ойууланар.

ХХ үйэ саҕаланыытыгар Дьокуускай куорат хайдах мөссүөннээҕэ олус чаҕылхайдык көстөр. Дорогуунап Ньукулай туохтан сылтаан эмискэ байбытын, Көрдөөх Көстүүнэйгэ туох иэдээн буолбутун, Мотуруос диэн кыраһыабай кыыс хомолтолоох дьылҕатын туһунан суруйааччы киһи эрэ сэҥээрэр гына сэһэргиир.

*Саха тыйаатырын артыыстара Герасим Васильев – Дорогуунап Ньукулай, Лагларыйа – Степанида Борисова.*

Уоскулаҥы билбэтэх эр бэрдин дьылҕатын эмискэ туох уларытарын билиэххин баҕарар буоллаххына, Былатыан Ойуунускай чулуу айымньытын аах. Айымньы түмүгүттэн долгуйарыҥ эрэбил.

Айымньыны аудио истэр сигэ: https://new.nlrs.ru/open/64023 (ааҕар СӨ үтүөлээх артыыһа Майя Слепцова-Эбээ Маайа).

Николай Максимович Заболоцкай-Чысхаан “Мааппа” кэпсээнэ

Кэпсээн соҕотох муммут айанньыт Ылдьаа кыһыҥҥы түүн иччитэх өтөҕү булуутуттан саҕаланар. Балаҕаҥҥа Мааппа кыыһы кытта соһуччу көрсүһүү… Бу кыыс суоһар кистэлэҥэ ааҕааччыны долгутар да, соһутар да.

Мааппа көрдөһүүтүн Ылдьаа толорор хорсун санаалаах дуо? Бу таайтарыылаах кэпсээн үгүс саха ааҕааччытын долгуппута.

Онлайн ааҕар сигэ: https://new.nlrs.ru/open/9337

Орто Халыма улууһун Өлөөкө Күөл оскуолатын үөрэнээччилэрэ оҥорбут буктрейлердара

“Мааппа” кэпсээнинэн уус-уран киинэлэр уһуллубуттара (реж. А.Романов).

Дмитрий Кононович Сивцев-Суорун Омоллоон “Аанчык” кэпсээнэ

Бу кэпсээни 1926 сыллаахха 21 саастаах эдэркээн Д.К.Сивцев суруйбута. Аанчыктаах Мыычаар олохторо табыллыбатаҕар ким буруйдааҕый? Кэрэ бэйэлээх Аанчык кэхтиитин олус долгутуулаахтык ойуулааһын үгүс саха ааҕааччытын уйадыттаҕа.

Онлайн ааҕар сигэ: https://new.nlrs.ru/open/12831

Николай Алексеевич Габышев “Анфиса” кэпсээнэ

Устудьуон Аркадий, кылгас кэмҥэ таайын дьиэтин дьиэлээри, Анфисаны көрсөр. Анфиса – икки оҕолоох аҥаардас ийэ. Таайа даҕаны, ыаллара да Анфисаны соччото суохтук ахталлар. Кинилэр саҥаларын Аркадий истиэ дуо? Анфисалыын бииргэ буолуохтара дуо?.. Ону мантан https://new.nlrs.ru/open/13881 ааҕан билиэххитин сөп.