1 год назад 1019
“Аахпыт киһи!” – дэстилэр
Туох кистэлэ кэлиэй, ыччат, уопсайынан, билигин үгүс киһи блогердары ханнык да учуонайдааҕар, биллэр эспиэртээҕэр, оннооҕор сорохтор бэйэлэринээҕэр даҕаны итэҕэйэн истэр, сэҥээрэн көрөр буолла.
Ол курдук, биирдэ түбэһэ көрбүппэр, блогер кыыс таҥха кэмигэр ханнык кинигэлэринэн таайар оруннааҕын кэпсиир. “Төлкө”, дьиҥэр, барсыбат ээ. Таҥараны, абааһыны, көстүбэт күүһү утарар роман дии. Ону тоҕо онон билгэлэнэҕит?” – диэн ыйытар. Онуоха сурутааччылара соһуйаллар, ис хоһоонун үчүгэйдик билбэттэрин билинэллэр. Ол иһин кыыспыт аны бэйэтэ аахпыт сахалыы айымньыларын билиһиннэрэн, туох туһунан буолалларын ырытан барда. Чуолаан “Хара кыталык” романы. Истээччилэрэ сэргээтилэр аҕай уонна: “Аахпыт киһи”, – дэстилэр. Таах мээнэ халтайга буолбакка, ким эрэ билиитин хаҥатыгар туһалаах сэһэргэһии буолла диэн, хата, мин испэр үөрэ санаатым.
Чахчыта да, ити “Хара кыталык” ааптара, норуодунай поэт, РФ култууратын үтүөлээх үлэһитэ, Саха АССР ускуустубаларын үтүөлээх диэйэтэлэ, «Северная звезда» Бүтүн Сойуустааҕы бириэмийэ лауреата Иван Михайлович Гоголев-Кындыл сарсын тохсунньу 18 күнүгэр төрөөбүтэ 95 сылын туолар.
Онон ситимнээн, баҕар, ол “Хара кыталыгы” ааҕарга соруммут дьон курдук интэриэһиргиэхтэрэ диэн, суруйааччы биир дойдулаах оҕолоро, Бүлүү куоратын Н.И. Протопопова аатынан “Кэскил” оҕо өйүн-билиитин уонна айар дьоҕурун сайыннарар киин иһинэн үлэлиир “Репортер” медиа-киин (салайааччы Кыдана Владимировна Дорофеева) устубут буктрейлерын таһаарабыт. Бэйэтэ тэттик киинэ курдук.
Ити буктрейлер күрэҕэр киирбит ролик. Видеопоэзия куонкуруһугар 2 кыттааччы Кындыл хоһоонун аахпыта.
Ньурба улууһун Дьиикимдэ С.И. Алексеев аатынан оскуолатын үөрэнээччитэ Елизавета Алексеева.
Мэҥэ Хаҥалас улууһун Алтан оскуолатын үөрэнээччилэрэ Еремей Матчитов, Уйгурова Кристина.
Национальнай бибилэтиэкэ Иван Гоголев-Кындыл айар үлэтигэр уонна тус олоҕор анаммыт электроннай кэллиэксийэни бэлэмнээбитэ. Бу сигэнэн киирэн көрүҥ: https://new.nlrs.ru/collections/1158?page=3
Кындыл үбүлүөйүнэн тохсунньу 17 күнүгэр Национальнай бибилэтиэкэ Историческай саалатыгар «Сиянье Севера в моей душе горит» диэн тэрээһин буолла.
Тохсунньу 18 күнүгэр, оруобуна төрөөбүт күнүгэр, Саха академическай тыйаатырыгар «Мин тапталым – поэзия» диэн дьоро киэһэ буолуоҕа.
