1 год назад 382
Өксөкүлээх сардаҥата сандаара турдун!
Саха омук үөрэхтэниитигэр сүдү кылааттаах сырдатааччы,
саха литературатын төрүттээччи, төрөөбүт тылын, норуотун историятын уонна култууратын чинчийээччи, норуот фольклорун хомуйааччы, бөлүһүөк Алексей Елисеевич Кулаковскай-Өксөкүлээх Өлөксөй былырыын төрөөбүтэ 145 сылын бэлиэтииргэ, СӨ бэрэсидьиэнин оскуолаларын ситимин уонна М.Е. Николаев киинин көҕүлээһиннэринэн, духуобунай лиидэрбит төрөөбүт күнүгэр чүмэчини уматар “Өксөкүлээх сардаҥата” диэн аахсыйа олохтоммута.
Ил Дархан Айсен Николаев ыйааҕынан 2023-2025 сыллар Өксөкүлээх биэс сылынан биллэриллибитэ.
Быйыл “Өксөкүлээх сардаҥата” аахсыйаҕа Саха Сирин араас муннуктарыттан куйаар ситиминэн элбэх киһи холбосто.
Николаев киинин кэмпириэнсийэлиир саалатыгар Өктөм нэһилиэгин олохтоохторо, оскуола үөрэнээччилэрэ, устудьуоннар мустан, Өксөкүлээх сардаҥатын сандаартылар.
Ыҥырыылаах ыалдьыттарынан буоллулар: норуодунай суруйааччы Сэмэн Тумат, өрөспүүбүлүкэтээҕи “Сахамедиа” генеральнай дириэктэрин солбуйааччы Чокуур Гаврильев, «Журфикс» сурунаал кылаабынай редактора Яна Угарова, А.Е. Кулаковскай институтун научнай үлэһитэ, к.п.н. Светлана Дарбасова, СӨ Национальнай архыыбын үлэһитэ Айталина Захарова, дириэктэри I солбуйааччы Наталья Николаевна Малышева, “Историческай өйдөбүл” уопсастыбаннай сэбиэттэн
Саргылана Неустроева.
Сардаҥа кыымын А.Е. Кулаковскай төрөөбүт дойдутуттан, Таатта улууһуттан, балаҕанын көмүлүөгүттэн Алексей Елисеевич сиэн кыыһа Рива Реасовна Кулаковская уматта. Таатта улууһун баһылыга Михаил Михайлович Соров уоттаах-төлөннөөх эҕэрдэтин эттэ.
Салгыы СӨ Ил Дархана А.С. Николаев эҕэрдэ тылын Чокуур Гаврильев
ааҕан иһитиннэрдэ.
Ол кэнниттэн Н.Г. Чернышевскай аатынан Бүлүүтээҕи педагогическай колледж дириэктэрэ Иван Алексеев: “Бу тэрээһини утумнуоххайыҥ, үгэскэ кубулутуоххайыҥ”, – диэн ыҥырда.
Сэмэн Тумат :«Өксөкүлээх сардаҥата сыдьаайда! Кини сырдык сардаҥата биһиги норуоппутугар сырдык сулус буолан, инникибитин сырдата, араҥаччылыы турдун!» – диэн этиитинэн түмүктэннэ.
Николаев киинэ
