2 года назад 268
«Экэнэмиис учуонай Василий Дарбасов» кинигэ сүрэхтэниитигэр
Дьокуускайдааҕы В.Г. Белинскэй аатынан Кыраайы үөрэтэр бибилэтиэкэҕэ кулун тутар 11 күнүгэр Саха Өрөспүүбүлүкэтин наукатын үтүөлээх диэйэтэлэ, наукаҕа уонна тиэхиньикэҕэ СӨ Судаарыстыбаннай бириэмийэтин лауреата, экэниэмикэ билимин дуоктара, бэрэпиэссэр Василий Романович Дарбасов-Дабаччыма төрөөбүтэ 80 сылыгар анаан бэртээхэй ахтыы киэһэтэ буолан ааста.
«Экэнэмиис учуонай Василий Дарбасов» диэн кинигэ сүрэхтэниитигэр аймахтара, учуонайдар, бииргэ үлэлээбит кэллиэгэлэрэ, доҕотторо кэлэн ахтан-санаан аастылар.
Василий Романович сырдык аатын үйэтитээри, кэргэнэ Марта Андреевна Кривошапкина, оҕолоро А.В. Данилова, А.В. Дарбасов, доҕоро Н.С. Николаев ылсан үлэлэһэн, кинигэ күн сирин көрдө. Үтүө киһи аата аата турарыгар, кэнчээри ыччакка кини олоҕо холобур буоларыгар бу кинигэ олук буолуоҕа диэн эрэллээхпит.
Кинигэ алта бастаах: Саха судаарыстыбаннай университетын устудьуона; Саха Сиригэр үрдүкү экэнэмиичэскэй үөрэхтээһини төрүттээччи; экэнэмиис учуонай, научнай үлэлэри тэрийээччи уонна салайааччы; сынньанар кэмигэр алтыспыт дьонун ахтыылара; кэргэнин, оҕолорун, сиэннэрин, аймахтарын уонна оскуолатааҕы доҕотторун ахтыылара; Василий Романович Дарбасов наукаҕа, литератураҕа оруола уонна миэстэтэ; сыһыарыылар.
Дабаччыма уус-уран литератураҕа суруйбут айымньылара, мастан кыһан оҥорбут саха уонна нуучча биллиилээх суруйааччыларын мэтириэттэрэ быыстапкаҕа уратытык көстөннөр, дьон болҕомтотун ыллылар.
Бу көрсүһүүгэ Василий Романович туһунан ахтыылары алтыһан ааспыт дьоно оҥордулар: экэнэмиическэй наука дуоктара А.А. Пахомов, физико-математическай наука кандидата М.У. Тимофеев, ХИФУ ыстаарсай научнай үлэһитэ С.Д. Дарбасова, Арассыыйа суруналыыстарын сойууһун чилиэнэ, СӨ култууратын үтүөлээх үлэһитэ В.Н. Луковцев, СӨ үтүөлээх суруналыыһа, «Көмүөл» кинигэ кыһа дириэктэрэ, суруйааччы Б.Н. Павлов, ССРС спордун маастара С.Т. Черноградскай, “Фермер-ас” тэрилтэ баһылыга А. П. Герасимов.
Кыраайы үөрэтэр бибилэтиэкэ ааҕааччылара ордук сөбүлээн Дабаччыма “Быйаҥнаах хочолорго”, “Үчүгэйиэн тыыннаах буолар!”, “Атыыһыт Кырбаһааҥкын”, “Куома Чааскын” айымньыларын ааҕаллар. Кини суруйуулара өйдөнүмтүө тыллах-өстөөх уонна иитэр-үөрэтэр өрүттээх. Сэргээбиттэри биһиги бибилэтиэкэбитигэр күүтэбит.
Саргылаана Колесова,
В.Г. Белинскэй аатынан Кыраайы үөрэтэр бибилэтиэкэ
