Научно-исследовательский институт чтения им. Ю.Н. Столярова НБ РС(Я) 3 месяца назад 103

Ийэ тыл уонна сурук-бичик декадата

Төрөөбүт тыл уонна сурук-бичик күнүгэр В.П. Ларионов аатынан физика-тэхиньиичэскэй лиссиэйгэ 9 «А» кылаас кэллэктиибэ, салайааччы Мария Юрьевна Саввина Кыайыы 80 сылыгар уонна Аҕа дойдуну көмускээччилэр сылларыгар аналлаах «Киэҥ эйгэҕэ сахалыы саҥарыы сатабыла» диэн ааттаах 8-10 кылаас оҕолоругар араатардар күрэхтэрин тэрийэн ыытта. Күрэскэ тыл билимин хандьыдаата, СӨ суруйааччыларын сойууһун чилиэнэ Ангелина Афанасьевна Кузьмина сахалыы сөпкө саҥарарга, суруйарга үөрэх ыытта, дьүүллүүр сүбэҕэ кытынна. Күрэх 2 түһүмэҕинэн ыытылынна. Бастакы түһүмэх: «Ийэ дойдуга бэриниилээх буолуу диэн тугуй?» тиэмэҕэ иһитиннэрии.  Иккис түһүмэх: Бэриллибит тиэмэҕэ тыл этии.Күрэх түмүгүнэн:

Анал аат «Дархан этээччилэр» – 10 А кылаас «Сээркээн сэһэн сиэннэрэ»

Анал аат «Өркөн этээччилэр» – 9 А кылаас «Сулустар»

Анал аат «Хомоҕой тыллаах этээччилэр» – 10 Б кылаас «Кустук»

Анал аат «Этигэн тыллаах этээччилэр» – 8 Б кылаас «Дьулуур»

Анал аат «Ыллыктаах тыллаах этээччилэр» – 9 Б кылаас «Саха кута»

Анал аат «Итэҕэтиилээх тыллаах этээччилэр» – 8 А кылаас «Эрэл»

Анал аат «Кэскиллээх этээччилэр» – 8 В кылаас «Эрчим»

Бары кыттыбыт оҕолорго, кылаас салайааччыларыгар, төрөппүттэргэ истиҥ махталбытын тиэрдэбит.

Онтон «Айыы кыһата» оскуола 6 кылаас үөрэнээччилэригэр Саха сиригэр аналлаах Ангелина Кузьмина тыл оонньуутун ыытта. Оҕолор билиилэрин, дьоҕурдарын көрдөрдүлэр.

Үрүйэ уутун курдук сэргэх, сир симэҕин курдук сиэдэрэй, илгэлээх ийэ тылбыт сүппэтигэр, сайдарыгар, инники кэскилэ кэҥииригэр үүнэн иһэр кэнчээри ыччаттарбыт кыһаныахтара диэн эрэнэбит .

Маны тэҥэ Ил Түмэҥҥэ сахалыы көрдөрөр-иһитиннэрэр эйгэ сайдыытыгар суруналыыстарга аналлаах сугулаан буолла. Гуманитарнай чинчийии институтугар этнография оскуолата, хотугу аҕыйах ахсааннаах омуктар тылларын начунай-чинчийэр кэмпириэнсийэ буоллулар. 

Ангелина Кузьмина, СӨ национальнай бибилэтиэкэтин ааҕыыны чинчийэр научнай институт  үлэһитэ.