1 месяц назад 55
Былатыан Ойуунускай аатынан Саха тыйаатыра уонна аудиовизуальнай нэһилиэстибэ национальнай киинэ бииргэ үлэлэһэргэ сөбүлэҥ түһэристилэр
Саха тыйаатыра төрүттэммитэ 120 сылынан уонна норуоттар икки ардыларынааҕы аудиовизуальнай нэһилиэстибэ күнүн чэрчитинэн Иван Спиридонович Жараев аатын СӨ норуоттарын аудиовизуальнай нэһилиэстибэ национальнай киинэ инники бииргэ үлэлииргэ сөбүлэҥ түһэрсэн илии тутустулар.
Алтынньы ый 31 күнүгэр Былатыан Ойуунускай аатынан Саха тыйаатырын дириэктэрэ Петр Тимофеевич Макаров уонна аудиовизуальнай нэһилиэстибэ национальнай киин дириэктэрэ Степан Иванович Москвитин инникитин бииргэ үлэлииргэ сөбүлэҥ түһэрсэр бэлиэ күннэрэ буолла. Тыйаатыр артыыстара, аудтовизуальнай киин үлэһиттэрэ Саха Академическай тыйаатырын биир дьоһун саалатыгар тоҕуоруһа муһуннулар.
Ааспыт кэм ахтылҕанын эргитэн 1944 сылтан саҕалаан Саха тыйаатырын туһунан хроника киинэ докумуоннарын күөх экранҥа ытыс тыаһынан долгуйан олорон көрдүлэр.
Биһиги сахабыт тыйаатырын нөҥүө дьоһуннаах норуот билиниитин ылбыт артыыстар Петр Решетников, Гаврил Колесов, Дмитрий Ходулов, Анна Кузьмина уо.д.а. үтүө бэйэлэрэ бу киирэн кэлбит курдук сыанаҕа толорууларын устуутун көрөн, киһи кута хамсыыр.
Аудиовизуальнай киин дириэктэрэ Саха АССР үтүөлээх артыыһыгар Зоя Петровна Багынановаҕа тэрилтэ пуондата хаҥыырыгар тус кылаатын киллэрбитин сыаналаан махтал суругу туттарда.
Петр Тимофеевич: «Саха тыйаатырын сыаналаах киинэ докумуоннара көрүүгэ киирбиттэринэн, инникитин артыыстар аатарын үйэтийэргэ бииргэ үлэлэһиэхпит. Баар киинэ докумуоннарбытын эһиги тэрилтэҕэ туттарыахпыт» -, диэн салҕыы ылсан бииргэ үлэлииргэ бэлэмин бигэргэттэ.
Ити курдук икки култуура тэрилтэлэрэ биир санааннан үлэлиир былааннара кэскиллээх уонна үйэлээх буоллун.
