1 месяц назад 140
Эдэр суруйааччылар ыалдьыттаатылар
Тылга туһаайыылаах Одун Хаан ыйыгар Майаҕа сэргэх тэрээһиннэр буоллулар.
И.М.Сосин аатынан киин бибилэтиэкэ үлэһиттэрэ уонна улуустааҕы “Таммахтар” литературнай холбоһук көҕүлээһиннэринэн Майа сэлиэнньэтин үс оскуолатыгар эдэр суруйааччылар ыалдьыттаатылар: Утум Захаров, Елизавета Мигалкина, Татьяна Жиркова, Мария Андреева, Сардаана Корякина, Любовь Готовцева, Римма Крылова, Анастасия Еремеева, Татьяна Жиркова, Любовь Готовцева.
Биһиги И.Г. Тимофеев аатынан лиссиэйбитигэр бэйиэт, Арассыыйа суруйааччыларын сойууһун чилиэнэ, СӨ култууратын туйгуна, СӨ ыччат бэлиитикэтигэр министиэристибэтин поэзияҕа гранын кыайыылааҕа Елизавета Мигалкина, бэйиэт, тылбаасчыт Римма Крылова, драматург, очеркист, кыраайы үөрэтээччи, Арассыыйа суруйааччыларын сойууһун чилиэнэ, Н.Д. Неустроев аатынан эдэр суруйааччылар бириэмийэлэрин лауреата, “Коркин. Андаҕар”, “Маһары. Ыраахтааҕыга айан”, “Бастакы” испэктээри суруйбут Утум Захаров күндү ыалдьыт буоллулар.
Айар үлэлэрин хаппахчытын сэгэтэн сэһэргээтилэр, олох туһунан анаардылар. Онтон бэйэлэрин хоһооннорун аахтардылар, ону үөрэнээччилэр хайдах ылыммыттарын сыаналаатылар, суруйар оҕолорго сүбэ-ама биэрдилэр.
Кылгас кэмҥэ күлүм көрсүһүү барыбыт өйбүтүгэр-санаабытыгар сылаас иэйиини бэлэхтээтэ.
Эбиэт кэннэ И.Сосин аатынан киин бибилэтиэкэҕэ нэһилиэнньэни кытта көрсүһүү тэрилиннэ.
Эдэр суруйааччылары Майаҕа өр сылларга учууталлаабыт хомоҕой хоһоонньут, “Таммахтар” литературнай түмсүү сүбэһитэ Августина Хабарова арыаллаата, иилээн-саҕалаан илдьэ сырытта.
Уус- уран тылы сөбүлээччилэргэ сэргэх күн ааста.
Мидена Петрова,
Майа лиссиэйин учуутала.
